ഖത്തറില് കോവിഡ് നിബന്ധനകള് പാലിക്കാത്തതിന് 152 പേര്ക്കെതിരെ നടപടി
ഖത്തറില് മാസ്ക് നിര്ബന്ധമാക്കിയിട്ടുള്ള സ്ഥലങ്ങളില് മാസ്ക് ധരിക്കാത്തതിന് 150 പേര്ക്കെതിരെ നടപടി. ഇതിന് പുറമെ മൊബൈല് ഫോണുകളില് ഇഹ്തിറാസ് ആപ്ലിക്കേഷന് ഇന്സ്റ്റാള് ചെയ്യാത്തതിന് രണ്ട് പേരെയും പിടികൂടി. ഇവരെ പബ്ലിക് പ്രോസിക്യൂഷന് കൈമാറിയതായി ആഭ്യന്തര മന്ത്രാലയം അധികൃതര് അറിയിച്ചു.
രാജ്യത്ത് കോവിഡ് നിയന്ത്രണങ്ങളില് ഇളവ് നല്കിക്കൊണ്ടുള്ള ക്യാബിനറ്റ് തീരുമാനത്തിന് അനുസൃതമായാണ് നടപടി സ്വീകരിച്ചതെന്ന് അധികൃതര് അറിയിച്ചു. അടച്ചിട്ട പൊതുസ്ഥലങ്ങളില് മാസ്ക് ധരിക്കുന്നത് തുടരണമെന്നാണ് നിലവിലെ നിര്ദേശം. അതേസമയം തുറസായ പൊതുസ്ഥലങ്ങളില് ഇപ്പോള് മാസ്ക് നിര്ബന്ധവുമില്ല. എന്നാല് പ്രത്യേകമായി സംഘടിപ്പിക്കപ്പെടുന്ന പരിപാടികളില് മാസ്ക് ധരിക്കണം. ഇതിന് പുറമെ പള്ളികള്, സ്കൂളുകള്, യൂണിവേഴ്സിറ്റികള്, ആശുപത്രികള് എന്നിവിടങ്ങളിലും മാസ്ക് നിര്ബന്ധമാണ്.